Storie
ALC DI STORIE
Il tiermin “Bicinicco” al è un toponim roman che al derive di un non propri di persone (probabilmentri un ciert Beccinius o Buccinius), prin possident de tignude di cheste zone.
La desinence in –icco, dut câs, al rimande ancje al timp celtic. La prime citazion storiche di Bicinins e va indaûr al 1031. Sotan de jurisdizion dai siôrs Savorgnan fintremai al an 1797, l’atuâl cjâf lûc al devente comun intal Lui dal 1866.
Il non “Cuccana” al ven di cuc – cucco, o ben alture taronde. Cucane e je memoreade bielzà intal 1295. Feut dai Strassolt, vie pe dominazion venite e diven “vile comune” (1635), ven a stâi aministrade diretementri dal lutignint de Patrie dal Friûl.
Il non “Felettis” al à origjin dal tiermin latin filitcum (felet); la vile di Feletas, possediment dai Di Colorêt, e salte fûr testemoneade dal 1031 indenant. Dilunc il secul XV e ven plui voltis distrute des tremendis scorsadis dai Turcs.
Il non “Gris” al ven dal tiermin todesc medi griez, che al vûl dî teren savalonôs o glerie fine. La prime citazion e va indaûr al 1295, cuant che la vile Greys e ven nomenade tant che sotane ae plêf di Lavarian e sometude ai siôrs di Cjistiel.