Secjadôr di tabac
Lis fortunis se pûr alternis de coltivazion dal tabac te plane furlane a fasin in mût che al deventi convenient realizâ un stabiliment par candî in loco, che al sedi bon di ricevi il prodot a pene cjapât sù e trasformâlu intes condizions miôr pe lavorazion seguitive. Par cheste necessitât pratiche al nas il secjadôr di Grîs.
Grîs al è intune posizion centrâl tal Friûl di Mieç. Frazion dal Comun di Bicinins al à dome cualchi centenâr di abitants e al è cognossût pe sô gleseute di Sant Andree preziose di frescs rinassimentâi.
Il tabac al è la ocasion par rilançâ la ativitât agricule locâl tai agns Trente daspò de crisi dal principi dal secul che al à viodût un massiç esodi migratori e l'impuariment des fameis contadinis.
Si pense a lavorâ in loco il prodot e a fâ sù un stabiliment sui terens donâts dal possident Attilio Facini.
Il stabiliment al è progjetât dal ing. Ferdinando Calligaris di Udin e al tache a funzionâ ai 15 di Otubar dal 1934. Al è so promotôr Joaqunn o Jachen Dorta, un imprenditôr di origjinis ebraichis, che ‘ndi sarà ancje il prin diretôr. Federico Tacoli, che i fo dongje par une lungje dade di timp lu ricuarde come une persone ecezionâl di grandis capacitâts e cognossincis.
Inaugurât ai 17 di Setembar dal 1932 il stabiliment al ven completât in cuatri agns dal 1932 al 1936 in plene campagne par limitâ il plui pussibil lis impuartazions. Al impegne cuasi dal dut lavoranzie feminîl e al cjape sù il prodot di un fuart nucli di agricultôrs, massime Kentuky. Po dopo des leçs raziâls Dorta al scugne lassâ il so incaric e il stabiliment al decjât imburît.
Cu la vuere l'Ent nazionâl dal Tabac al sburte ancjemò lis coltivazions di tabac par cjapâ sù i prodots secondaris: celulose dai fros, vueli des sepis, il pinel, risultum bondant di proteinis pai animâl di arlevament. "Coltivâ tabac - si scrîf sul Popul dal Friûl - al devente vuê un bon implei agricul e une arme in plui pe indipendence economiche de Nazion".
Finude la vuere la ativitât e torne a cjapâ pît a dut podê parcè che no cale la superficie coltivade.
Il stabiliment al si inserìs intun contest che al è chel di un paîs rurâl, inmò ancje visivementri inrocjât ator dal so centri vecjo e no slargjât ae perifarie cemût che al è vuê. Al è une novitât cu lis sôs vastis superficiis, cu la nape lungje sfilade a cilindri, cul so va e ven di personis. Si trate di une superfìcie ocupade di ben 5000 metris cuadris, cuntun complès di edificis che nol à il so pâr tal contest urbanistic locâl.
I locâi che a forin dal secjadôr di Grîs cumò a stan bandonâts, lassâts al frui dal timp che al passe, memorie di une stagjon fortunade e no si viôt, pal moment, un lôr ûs razionâl. Indì di vuê al si fevele tant di archeologjie industriâl tal revisitâ ce che al reste di ativitâts produtivis che àn vût un significât impuartant inte vite di une comunitât o di une zone. Locâi restâts vueits, vecjos machinaris, spazis no doprâts, a vegnin discuvierts e valorizâts, tornâts a meti in vore no plui par produsi, ma par tignî iniment.
In Friûl a son dispès pagjinis di storie scognossudis ai plui, storie che nissun al à scrit, ma che e vîf inte memorie de int, consacrade di valôrs come la fede o il lavôr o il coragjo di vivi. E je par solit une storie fate di int umile, di chei che no àn puest ni su lis primis pagjinis di gjornâl ni su la ribalte televisive.
Par vê altris informazions si pues acuistâ li dal comune la publicazion "L'essicazione tabacchi di Gris" ilustrade parsore.