Personaçs famôs

don. ORESTE PAVIOTTI
Date di nassite: 30-01-1911 Italie
Prime profession: 09-01-1930 Shillong
Sacrament al ordin: 05-11-1938 Mawlai
Defont: 11 -10-1991 Italie
Tal moment de sô muart, Pari Oreste al partignive a ING, ma al veve lavorât par agns tal individût INM a Bangalore.
Notis biografichis
Oreste Paviotti al nassè ai 30 di Zenâr dal 1911 a Bicinins, Udin, Italie. I siei gjenitôrs a jerin Luigi Paviotti e Anna Maria Di Tommaso.
Al jentrà tant che aspirant missionari inte mission di Ivrea tal 1928 e al le in Indie tal 1929. Al fasè il so noviziât a Shillong inte "Casa di nostra Signora" e al professà ai 9 di Zenâr dal 1930. Il zovin Oreste al studià filosofie simpri a Shillong e il so adestrament pratic a Guwahati dal 1932 al 1934. Vie par cheste dade di timp al aprofondì i studis de lenghe Assamese. Plui tart al publicà ancje un libri di gramatiche in lenghe "Assamese".
Al scomençà i studis di teologjie a Shillong, ju puartà indenant a Woodcot (Darjeeling Dt) e al fo ordenât predi a Mawlai ai 5 di Novembar dal 1938.
Sacerdozi
Dal 1939 al 1941 al fo tal College "Sacro Cuore" di Mawlai in cualitât di catechist e insegnant di Teologjie. Tal 1942, insieme cun tancj altris missionaris, al le tal cjamp di concentrament, prime di Deoli e po dopo a Dehra Dhun. Dopo de vuere, al lavorà tal sud par une piçule dade di timp e tal 1946 al tornà a Mawlai cu la cualifiche di professôr di Teologjie. Tal 1948, dopo vê finût il M.A., al fo Diretôr de Scuele Superiôr "S. Antonio" a Shillong, par une piçule dade di timp e po dopo al fo Retôr al College salesian a Sonada.
Tal 1955 al tornà ae catedre di Teologjie a Mawlai. Tal 1968 al fo professôr di Teologjie e confessôr al College "Kristu Jyoti" a Bangalore. Po dopo al seguì un cors di "Missionologjie" a Rome. Tal 1976 al tornà ancjemò a Mawlai come Retôr dai students di teologjie. Tal 1979 al fo assegnât ae Scuele Tecniche "Don Bosco" a Shillong, li che al fo disponibil come amì e vuide pai tancj fantats di variis tribù dal nord est, ma al continuà lis docencis di "Missionologjie", Spiritualitât e Indologjie al College "Sacro Cuore", al College "Oriens" e al College "Cristo Rè" fin al 1990.
Ancje plui tart al continuà a tignî cors tai istitût li ator.
Tal Mai dal 1991, Pari Paviotti al le in Italie par un periodi di meretade polse e al spietave ansiôs di tornâ in Indie. Ma il Signôr lu clamà a sé tal Otubar dal 1991.
Carateristichis

1. Un cjâf brilant al servizi di Idiu: fin de sô infanzie Pari Oreste al jere cognossût pe sôs dotis di inteligjence e memorie tenace. Nol jere ce maraveâsi se i soi arlêfs lu vevin sorenomenât "Enciclopedia Ambulante".
Al dedicà lis sôs capacitâts al ben de Glesie e ae congregazion. Al amà la Indie e la sô int. Oltri al Sanscrit e l'Assamese al jere espert ancje in "Hindi" e "Khasi". Al veve ancje une profonde cognossince dai ûs e tradizions tribâls.
2. Religjôs esemplâr: la sô totâl disponibilitât e dedizion ae volontât dai soi superiôrs a jerin esemplârs. Chest al fo inmò plui notevul dopo vot agns di diocesi. Inte sô umiltât mai si vantà di ce che al fasè.
3. Sens dal umorisim: Pari Paviotti al jere ancje cognossût pal so brilant spirit umoristic.

Tal 1967, cuant che i fo proponût di frecuentâ un cors a la universitât gregoriane, al scrivè ai soi superiôrs cirche il so cincuantesim aniversari di cariere scolastiche (al tacà la classe prime tal 1917). "E tuttora" al fasè notâ "la gente parla di progresso!".
Vuide spirituâl: Pari Paviotti al passà i ultins agns de sô vite come vuide spirituâl par tante int, soredut pai zovins e par numerosis comunitâts religjosis di Shillong e li ator.
Dal moment che al rivà in Indie a la etât di 18 agns fin ae fin, al dedicà la sô vite a servizis caritatevui come su insegnament di Crist e po su esempli di Don Bosco.



Par plui informazions si rimande ae publicazion "don Oreste Paviotti - Missionario Salesiano" che si pues cjatâ tal Comun di Bicinins.

AMELIO PAVIOTTI
Amelio Paviotti al nassè a Bicinins (Udin) ai 9 di Mai dal 1913. Al frecuentà lis Scuelis Professionâls a Rubignac di Cividât come vuarfin di vuere e lis Superiôrs  tal Istitût di Art di Vignesie - Sezion Sculture - completant il cors dai studis tal 1940.
Tenent di fantarie tal 1942  al fo destinât in Russie e a Oranki ai 16 di Otubar dal 1943 al murì.

Par plui informazions su lis sôs Operaris si rimande ae publicazion "Amelio Paviotti" che si pues cjatâ tal Comun di Bicinins.