Ogjets pierdūts

Dulà consegnâ i ogjets cjatâts?
Il Citadin che al cjate cualchi ogjet bandonât come tacuins, bicicletis, ombrenis, documents e v.i., al è tignût a consegnâju al proprietari se lu cognòs, se chest al è scognossût al à di consegnâ ce che al à cjatât ae Aministrazion Comunâl.

Ce sucedial dopo la consegne dal ogjet cjatât?
Cuant che un ogjet cjatât al ven depositât li dal Comant di Polizie Municipâl al ven iscrit intun regjistri indicant date, lûc de cjatade e non di cui che al à cjatât, e a lui e ven rilassade une copie dal verbâl di deposit.
La Aministrazion Comunâl cun scjadince periodiche e informe il public de liste dai ogjets cjatâts par vie dal Cuadri Pretori.
Se lis robis cjatadis a presentin elements utii par identificâ il proprietari o il possessôr, l’ufici al proviôt a visâ chescj dal deposit.
Se la nature e lis dimensions dai ogjets lu permetin, tant che par esempli documents personâi, targhis di veicui, i stes a puedin jessi spedîts par vie pueste al Comun di residence dal interessât o ai uficis emitents, cun invît a proviodi ae restituzion.

A cui e cemût vegnino restituîts i ogjets cjatâts?
Lis robis cjatadis a vegnin restituidis, dopo vê fats i aciertaments e i riscontris dal câs, a cui che dentri di un an dal ultin dì di publicazion de liste al declari di jessi il proprietari o il possessôr.
De restituzion al ven redizût un procès verbâl, e une copie e ven mandade al Ufici di Polizie li che e jere stade eventualmentri denunciade la pierdite o la robarie dal ogjet.

Se nol si presente il proprietari?
Passât un an dal ultin dì de publicazion de determine cence che si sedi presentât il proprietari, la robe depositade a parten a cui che la à cjatade (art. 929 dal Codiç Civîl).
Chel che la à cjatade al ven visât e invidât a ritirâ ce che al è depositât dentri di 30 dîs. De consegne e ven redizût un procès verbâl.
Passât chest timp cence che chel che al à cjatât la robe si presenti, il Comun al si riserve la disponibilitât de robe.

Ce sucedial se si cjate un ogjet bandonât e no si lu restituìs?
L’articul 647 dal Codiç Penâl al stabilìs che al è punît a cuerele de persone ofindude, cu la reclusion fin a un an, e cu la multe di £. 12.000 a £. 120.000, cui che dopo vê cjatât bêç o robis pierdudis di altri al si aproprie, cence osservâ lis prescrizions de leç civîl sul acuist de proprietât di robis cjatadis.

Dulà si fasie la denuncie di pierdite o robarie?
Si pues fâ denuncie di pierdite o robarie di robis o ogjets di proprietât li des Fuarcis di Polizie che a son sul teritori comprendude la Polizie Municipâl.