Contrassegn invalits

Dutis lis personis invalidis cun capacitât deambulatorie ridote (sedi permanente sedi provisorie) a puedin domandâ di vê il "contrassegn invalits" di pueste.

Cemût vêlu

Si à di:
domandâ certificazion mediche ae Aziende pai Servizis Sanitaris di partignince;
presentâ la domande, zontant il certificât dal miedi, li dal Comant di Polizie Municipâl.
Tal câs di invaliditât permanente, il contrassegn al varà validitât di cinc agns (la scjadence  e ven indicade sul stes), invezit tal câs di invaliditât provisorie, la date di scjadence e sarà chê indicade inte certificazion sanitarie.

Cemût doprâ il contrassegn

Cheste autorizazion e permet a lis personis invalidis di:
- sostâ cu lis veturis tai spazis di pueste contrassegnâts cu la segnaletiche par tiere zale e verticâl (Diviêt di Soste. Soste consintude a lis personis invalidis);
- transitâ e sostâ tes zonis a trafic limitât;
- sostâ ancje se al è il diviêt di soste indicât cun segnâl di pueste verticâl o orizontâl, baste che chest nol costituissi grâf pericul o intric pe circolazion;
- sostâ tes zonis a soste regolamentade, cence l’oblic di rispietâ i limits di timp.
Chest contrassegn al è personâl e al à di sedi doprât dome se la persone invalide e je presinte tal veicul tal moment che al ven doprât.

Li che nol è pussibil doprâ il contrassegn

Nol è pussibil doprâlu par evitâ i diviêts di soste dai artt. 157 e 158; di fat chescj articui a proibissin la fermade e la soste li che e esist une segnaletiche verticâl o cun semafar, e in mût di no platâle a la viste, dongje di corsiis di canalizazion li di areis di intersezion (croseris), devant di pas cjarezabil, in seconde file, sui passaçs pedonâi e sui marcjepîts.
Il contrassegn al à validitât su dut il teritori nazionâl.

Ce che al sucêt se la persone invalide no je tal veicul

Doprâ chestis facilitazions cul veicul che, ancje se furnît dal contrassegn speciâl, nol sedi condot o pûr nol sedi al servizi de persone invalide, al compuartarà la aplicazion des sanzions dai artt. 158 come 2 e 6 e 188 come 4.

Se il parchegjo riservât al è ocupât di une soste abusive

Tal câs di soste abusive di chei che no àn dirit dentri dai puescj di parcâ riservâts ai invalits e regolarmentri segnalâts, i orghins di vigjilance a puedin rimovi i veicui daûr dal gnûf Codiç de Strade (art. 158 come 2).