Contrassegn invalits

Dutis lis personis invalidis che a àn une capacitât di deambulazion ridusude (sedi permanente sedi temporanie) a puedin domandâ che al sedi dât fûr il "contrassegn invalits" a pueste.

Cemût otignî il permès

Si à di:

- domandâ certificazion mediche a la Aziende pai Servizis Sanitaris di apartignince;

- presentâ la domande, zontant il certificât miedi, li dal Comant di Polizie Municipâl.

Tal câs di invaliditât permanente, il contrassegn al valarà par cinc agns (la scjadince e je segnade tal contrassegn stes), invezit tal câs di invaliditât temporanie, la date di scjadince e corispuindarà a chê indicade da la certificazion sanitarie.

 

Cemût doprâ il taiant

Cheste autorizazion e permet a lis personis invalidis di:

- sostâ cu lis veturis tai spazis contrassegnâts a pueste da la segnaletiche orizontâl zale e verticâl (Diviêt di Soste. Soste permetude a lis personis invalidis);

- transitâ e sostâ tes zonis a trafic limitât;

- sostâ ancje se al è il diviêt di soste indicât cuntun segnâl verticâl o orizontâl a pueste, baste che nol costituedi un pericul grâf o un ostacul par la circolazion;

- sostâ tes zonis a soste regolamentade, cence oblic di rispietâ i limits di timp.

Chest contrassegn al è personâl e al à di jessi doprât dome se la persone invalide e je  presinte tal veicul cuant che si lu dopre.

 

Dulà no si pues doprâ il taiant

No si pues doprâlu par derogâ ai diviêts di soste che a son indicâts tai articui 157 e 158: di fat chescj articui a improibissin la fermade e la soste dulà che e je une segnaletiche verticâl o semaforiche, e di mût di no platâle, in prossimitât di corsiis di canalizazion e in corispondence o in prossimitât di areis di intersezion (incrôs), denant dai pas di veicui, in seconde file, sui passaçs pedonâi e sui marcjepîts.

Il contrassegn al è valit su dut il teritori nazionâl.

 

Ce sucedial se no je la persone invalide tal veicul

Valêsi des facilitazions descrivudis parsore cul veicul che, ancje se furnît dal contrassegn speciâl nol sedi condusût o nol sedi al servizi da la persone invalide, al compuartarà la aplicazion des sanzions che a son tai articui 158 come 2 e 6 e 188 come 4.

 

Se il parcament risiervât al è ocupât di une soste abusive

Tal câs di soste abusive di cui che nol à dirit dentri dai puescj di parcament risiervâts ai invalits e segnalâts in maniere regolâr, i orghins di vigjilance a puedin rimovi i veicui tal rispiet dal gnûf Codiç da la Strade (art. 158 come 2).