Ogjets pierdûts

Dulà consegnâ i ogjets che si cjatin.

Il Citadin che al cjate ogjets abandonâts come che a son tacuins, bicicletis, ombrenis, documents e v.i., al à di consegnâju al proprietari se lu cognòs. Se no si lu cognòs al à di consegnâ ce che al cjate a la Aministrazion Comunâl.

Ce sucedial daspò da la consegne dal ogjet cjatât?

Cuant che si deposite un ogjet cjatât li dal Comant di Polizie Municipâl si lu iscrîf intun regjistri segnant date, puest dulà che al è stât cjatât e cui che lu à cjatât, che al varà une copie dal verbâl di dipuesit.

La Aministrazion Comunâl cun cadence periodiche e fâs savê a la int la liste dai ogjets cjatâts par mieç dal Cuadri Pretori.

Se lis robis cjatadis a mostrin elements utii par identificâ il paron o il possessôr, l’ufici al proviôt a visâju che al è stât fat il dipuesit.

Se la nature e lis dimensions dai ogjets lu permetin, come a esempli documents personâi, targhis di veicui, chescj si puedin spedî par mieç da la pueste al Comun di residence dal interessât o ai uficis emitents, cun invît a proviodi a la restituzion.

A cui e in ce maniere si restituissin i ogjets cjatâts?

Si restituissin lis robis cjatadis, daspò di vê fat i aciertaments e i controi dal câs, a chel che dentri di un an da la ultime dì di publicazion da la liste al declaredi di jessi il paron o il possessôr.

Si scrîf un procès verbâl da la restituzion e si mande une copie al Ufici di Polizie dulà che eventualmentri e jere stade denunziade la pierdite o la robarie dal ogjet.

Se no si presente il proprietari?

Passât un an da la ultime dì di publicazion da la determine cence che si sedi presentât il proprietari, la robe depositade e je di cui che le à cjatade (art. 929 dal Codiç Civîl).

Chest al è visât e invidât a ritirâ ce che al è depositât dentri di 30 dîs. Si scrîf il procès verbâl da la consegne.

Passât chest timp cence che cui che al à cjatât la robe si presentedi, il Comun si risierve la disponibilitât da la robe.

Ce sucedial se si cjate un ogjet abandonât e no si lu restituìs?

L’articul 647 dal Codiç Penâl al stabilìs che al è punît a cuerele da la persone ofindude, cu la reclusion fin a un an e cu la multe di £. 12.000 a £. 120.000, cualsisedi che al vedi cjatât bêçs o robis che altris a àn pierdût e ju ten, cence rispietâ lis prescrizions da la leç civîl su la acuisizion da la proprietât di robis cjatadis.

Dulà fâ la denunzie di smariment o robarie?

Si pues fâ denunzie di smariment o robarie di robis o ogjets di proprietât li des Fuarcis di Polizie che a son sul teritori comprendude Polizie Municipâl.