Servizis Sociâi

Segretariât Sociâl

Al consist intune ativitât di sportel direte a dute la popolazion e al furnìs lis informazions su lis risorsis e sui servizis disponibii, al organize lis rispuestis rispiet a lis domandis avanzadis, al met in vore il plan di intervent concuardât cu la persone o il nucli, al dirêç viers chei altri servizis publics o privâts cjapâts dentri.

Servizi di Assistence Domiciliâr e Pascj a Cjase

Il servizi di jutori a cjase si articole in:

  • jutori domestic e cure da la persone (cure da la cjase, lavandarie, spese e furniments, furnidure di pascj, acompagnament dal utent par esigjencis diferentis, cure e igjiene da la persone, esecuzion di pratichis e control da la soministrazion di medisinis prescrivudis dal miedi);
  • distribuzion dai pascj a cjase.

Sostegn e intervents ai minôrs

Al consist intune serie di intervents articolade in:

  • intervents di caratar preventîf (studi e ricercje par individuâ lis causis dai stâts di bisugne e di emargjinazion - la promozion di ativitât e di iniziativis di agregazion - la individuazion di struturis adatis di sostegn a caratar residenziâl);
  • intervents assistenziâi come i intervents integratîfs da la famee (assistence economiche, assistence abitative, assistence domiciliâr, facilitazions par che i fruts di fameis che a son in dificoltâts economichis a podedin usufruî servizis sociâi come asîi nît, scuelis maternis, semiconvits, centris di riabilitazion; intervents sostitutîfs da la famee);
  • afidament a une altre famee cul mantigniment vuidât dai rapuarts cu la famee di origjin;
  • intervents di inseriment lavoratîf a traviers da la gjestion di borsis di inseriment lavoratîf par minôrs e fin cuant che no rivin a 21 agns cu la individuazion da la sede di lavôr e la elaborazion dal progjet lavoratîf stes cul referent/datôr di lavôr.

Sostegn economic a sengui e nuclis in condizions di bisugne

A son contribûts che il Comun al da fûr a personis o fameis che a son in cundizion di bisugne.

Si dan:

  1. a chei che a àn redits che no rivin al vitâl minim;
  2. par spesis straordenariis (spesis scolastichis, abitativis, paiament retis di istitûts e v.i.);

Par otignî chescj contribûts si à di lâ li dal Ufici Servizis Sociâi, compilâ une domande suntun model za preparât, sotscrivile e zontâ la documentazion che e covente.

Il Servizi Sociâl, finide la istrutorie da la pratiche, al proviodarà a comunicâ al interessât il gjenar di contribût, la entitât, la decorence, la durade e ancje la eventuâl no amission par la mancjance dai recuisîts.

RECUISÎTS: I beneficiaris no àn di vê un redit che il passe il minim vitâl, cussì come che al è definît dal Regolament dai contribûts economics dal Ent.

Intervents par la integrazion dai disabii

Il Servizi Sociâl par mieç dal Ambit Sociâl Sud n. 6.3 al sigure la integrazion des personis disabilis tal ambient familiâr e sociâl di apartignince a traviers di chescj intervents:

  • prestazions che a rivuardin il sostegn soci assistenziâl scolastic;
  • ativitât integrative di valence soci educative tai asîi nît, tes scuelis di ogni ordin e grât e ancje tal setôr extra scolastic;
  • ativazion e sostegn di modalitâts individuâls di traspuart;
  • servizi di jutori personâl.

Il Comun, come chei altris Comuns che a fasin part dal Ambit, al à delegât a la Aziende pai Servizis Sanitaris n. 5 "Basse Furlane" cualchi servizi par i disabii come:

  • centri soci riabilitatîfs e educatîfs diurnis;
  • soluzions abitativis protetis in alternative a la istituzionalizazion;
  • centris residenziâi par grâfs e une vore grâfs;
  • ativitâts diretis a sigurâ l'inseriment lavoratîf;

  • Permanencis climatichis.

Setôrs di aplicazion:

Si pues doprâ chest model par inviâ dutis lis istancis al servizi sociâl, cuant che no son i modui preparâts a pueste.

ENTS e SOGJETS DI COMPETENCE:

  • ENTS DI COMPETENCE: Comun di Residence
  • UFICIS DI COMPETENCE: Servizi Sociâl dal Comun