Gjeneralitât, Teritori e Paisaç

Chest piçul paîs da la basse furlane (16 Km2) al conte cuasi 2.000 abitants e al cjape lis frazions di Cucane, Feletis e Grîs. Sot dal aspiet urbanistic, la struture dal paîs e je chê ricorinte dai piçui centris de planure.

I cuatri nuclis abitâts, che cui lôr centris storics a costituissin esemplis otims di architeture rurâl, dut câs a àn lis lôr peculiaritâts: Bicinins di sore, Feletis e Grîs a mostrin un svilup architetonic formât di cortinis ediliziis compatis, principalmentri dongje des glesiis, cu li sfaçadis metudis de bande de strade; invezit Cucane e Bicinins di sot a mostrin une struture urbanistiche plui frazionade, che e corispuint a edificis sparniçâts. Cumò si note la tindince positive a recuperâ il centri storic. La edilizie residenziâl e je favoride, soredut in perifarie, dulà che si viôt la afermazion dal gnûf model abitatîf da la vilute individuâl, tipologjie che si diferenzie dai insediaments abitatîfs storics leâts invezit a la vite contadine.

La economie locâl e je leade a la agriculture e al arlevament, simpri plui unidis a lis iniziativis dal gjenar agrituristic; ancje la presince des ativitâts artesanâls e industriâls e je impuartante e il paisaç rurâl, e ancje i sengui edificis, - che cualchi volte a son tacâts diretementri su lis struturis antighis - cence dubi a àn risintût di chest.

Dut câs, il paisaç di Bicinins al ten pe plui part intatis lis sôs carateristichis: ca il mont di une volte si caraterize soredut par un patrimoni unic, formât di glesiis e gleseutis di campagne - che a van indaûr a epochis diferentis - e par cualchi notabil complès nobiliâr.